Der Seidelbast
Seiritzatle a’n kahla Heckle,
wia-n e sieh und wia-n e sag:
Seiritzatle, a’n kahla Heckle
stohscht im alta Buachaschlag.
Ziahscht dei fuierrauts Regischter
und verdrescht da Leuta d Köpf
und bischt so vo deina Gschwischter
jetzt halt s ällervürneamscht Gschöpf.
Ganz alloi duascht d Stellung halta
und verschenkscht dei Bluascht drzua
und verschaichscht drmit deam alta
Winterwald de butzat Ruah.
Stellscht de mit deim nobla Fräckle
und duascht voar em Wald duß schao
ällas mit deim guata Gschmäckle
wieder leabig weara lao.
– Bruno Gern